老婆不煲汤
王亭之最喜欢饮汤水，唯今年王亭婆罢工。晚晚不煲汤，王亭之抗议，她还要讲风凉话曰：「老婆煲汤慨咩，你有冇睇粤语片。梗系阿二阿三煲者也。」
王亭之如果后生几年，一定依足「大清律例」做俾佢睇，唯于今垂垂老矣，只好死死气气，饮酒楼饭店的例汤。
于是乎，始发现酒楼饭店的例汤，有许许多多问题。
最大毛病是配搭不精。例如沙参玉竹煲猪腱，好汤也，可是却落雪耳，于是乃成为最大的败笔。
雪耳宜炖不宜煲，而且不宜与沙参与玉竹同煲，一同煲，几味汤料一齐索水，一碗汤便无多少可饮，饮汤即是饮汤，你估食汤渣耶？
又例如，白菜煲猪肺，亦好汤也，但却落错鱆鱼。
鱆鱼带腥，与半肥瘦的猪肉同煲尚可，有油可以解腥，与猪肺同煲，则腥膻过什，兼且鱆鱼并无清润之功，根本与白菜煲猪肺的性能不合。
再例如，青红萝卜煲牛腱，亦是好汤，但王亭之却饮过一次「茂派制作」，偏偏学人加薯仔蕃茄，于是既非罗宋汤，亦非牛尾汤，更不是我国传统的汤水，故驴非马，莫此为什，令到王亭之要讲粗口。
至于「师父」多，或咸淡不适中，则乃常见的毛病，见怪不怪矣。
晚晚有应酬出街吃饭的人，必以汤水靓的酒楼饭店为首选，没有靓汤，不易拉住熟客，所以为人为己，王亭之很希望各店重视那煲例汤，而且配料要讲究细节，不可萝卜拉埋就是菜，胡乱堆砌一番，幸甚幸甚。
王亭之谈食
出版日期：一九八七年二月